رد: روح هادئة، ونفس لاترغب بـ شيء
امس رحت أفطرت عند واحد من الشباب
بحارتنا القديمه نقلنا عنها قبل 15سنه
ولي عن الحارة والشباب تقريبا 13 سنه
وبالصدفه قابلت واحد منهم ب المستشفي
وتواصلنا وأخذنا حسابات بعض وطبعا كان زعلان مني لأني قطعت التواصل
مع ان تغيرت الأرقام وظروف والاجهزه ف صار صعب نتواصل
المهم ماعلينا
طلعت من البيت ساعة 4ونص نزلت عنده ساعة 5ونص
طبعا زحمه الطريق من الشمال للجنوب
رحت أفطرت عنده واستمتعت وياه والله تذكرنا أيام زمان
ولعبنا طائرة وقدم
طبعا صليت العشاء والتراويح بمسجد الحارة القديمه
وأنا طالع إلا أقابل شخص أنا ماعرفه بس هو يعرفني
اول مرة قال عبدالعزيز وشافني مالتفت له
رجع وناداني ياولد عبدالعزيز عسيري التفت له
كان يجي عندي قلت له هلا ياعم أمر
قال انت ولد عبدالعزيز ولا حفيده
قلت له : هالله هالله اي أنا ولد عبدالعزيز
كان يقول سبحان الله ما أخطيت يوم شبهتك فيه كنت شاك ان هذا عبدالعزيز ولا ولده ولا واحد من جماعته
كان أقول له يامرحبا بك ياعم بس ماعرفتك مين انت
قال قبل أقول لك مين أنا. انت اي واحد فيهم الصغير آخر أولاده ولا
قلت اصغر أولاده قال ماشاء الله تشبه أبوك زولك واللي يشوفك من خلف يقول عبدالعزيز لو ما اعرف ان الرجال مات كان قلت انك هو
قلت الله يرحمه يارب
كان يمسكني من يدي. ويشد عليها وقال سبحان الله تشبه أبوك وكان يحبك حيل
ومايشوف مثلك كان يحبك اكثر من عياله كلهم سبحان من زرع حبك في روحه
وكانّه عارف ما راح يشبع منك كان يأخذك كل مكان
ومايرضى على زعلك وإذا شاف دموعك يضعف
قال أبوك كان طيب ومحترم والكل يحبه
قلت له الله يرحمه ، بس اعذرني ياعم أنا ماعرفتك مين
قال أنا ولد صاحب أبوك وصديق اخوك قلت له يأهلا والله تشرفت فيك
قال لا تقطع أوصلنا.
قلت له تأمر يا عم
كان يضرب يدي على خفيف كان يقول لا تقول عم
أنا كبر اخوك
ضحكت وقلت له العذر منك والله حتى اخوي أناديه يبه
أنا بعمر ولدك ياعم
وضحك وقال في ذا صادق انت بكبر ولدي
سعدت يوم شفتك يا نايف وخلنا نشوفك
قلت له ان شاء الله
ومشيت
استمتعت اليوم لما زرت الحارة القديمة قابلت أشخاص زمان عنهم
وسمعت سوالف عن الوالد اثلجت صدري وجعلتني فخور أني ولده
الله يرحمه
|
العرض العادي
